AIRIÑOS DA FREBA

Con Grelos

Airiños da Freba é un sexteto de música tradicional con máis dunha década de historia e cun repertorio orixinal, baseado en recollidas propias e investigacións, co fin de aportar frescura a quen o escoita, pero tamén transmitir a sensación de que aínda queda moito por descubrir do noso inmenso patrimonio musical. Galardoados nos Premios Martín Códax da Música 2022 na categoría de Música Tradicional, a proposta que nos traen estes lugueses é unha divertida viaxe no tempo pola súa provincia, concretamente aos anos 30, 40 e 50 do século pasado, cando quintetos, diversos conxuntos e orquestinas amenizaban aquelas festas de roupa amidonada, de iluminación con luz “de gas” e ringleiras de bombillas no campo da festa.

No seu haber, dous discos publicados: a súa ópera prima, “O de lacón” (2017), e o máis recente, “Con grelos” (2020), un mañuzo de pezas apañadas polas hortas lucenses, que dan boa conta da riqueza do “nabal” do noso patrimonio etnomusical, no que tamén inclúen a emigración a Barcelona e á Arxentina. Todo un convite ao baile e á festa!

Ficha técnica

• Xénero: Música tradicional
• Elenco: Daniel Carballo (Maka) (voz, tambor e percusións), Rebeca Tallón (bombo-chis e percusión miúda),Víctor Villamor (gaita), Luís Quintana (saxo soprano), Pablo Pintor (clarinete) e José Manuel Díaz (acordeón)
• Duración do espectáculo: 75 minutos